Македонска Забава

Македонските забави во Чикаго се вистинско уживање и забавување за сите присутни. Екипата на Macedonian Social присуствуваше на журката во македонскиот ресторант Скадарлија во околината на Чикаго, каде присутните ги забавуваа Ристе Тевдоски, Крис Бајмаковиќ, Антонио Тасевски и Владо Пупиноски на саксофон. 

Се пееја забавни и народни македонски песни, а расположението беше на високо ниво. Убавата атмосфера ја забалежа токму и нашиот објектив. 

На прашањето како самите изведувачи си поминаа, тие ќе кажат 

– Забавата беше одлична, се надевам дека и нашата публика и слушатели исто така беа задоволни и се надевам на наредните забави ќе пробаме да ги исполниме сите вкусови – изјави Владо 

– Јас си поминав прекрасно, чувството е неописливо кога станува збор за македонска забава. Собрани сите на куп и сите во еден глас ги пееме заедно нашите песни. – рече Антонио 

– Навистина е убаво да се биде опркужен со наши луѓе, во наше место, чувствувајќи се ако дома, а сепак толку далеку од неа. – изјaви Ристе 

Ова трио настапува на најголемиот број македонски забави во Чикаго, но и низ цела Америка. Еден од првите кој што започнал да организира и настапува е токму Владо Пупиноски , кој на прашањето од кога започнале да се организираат вавкви забави ќе рече: 

– Уште од самото формирање на МАKO Центарот (MACE Center) во Февруари 2010 година, мојата идеја и желба беше паралелно да се негува македонската забавна и народна музика, со тоа што ќе се одржуваат забави на кои во живо ќе бидат изведувани тие песни, а кои не се доволно исполнувани во македонската дијаспора, почнувајќи од хитовите на Тоше Проески, Леб и Сол, Каролина, Калиопи, Дарио, Меморија, Нокаут, Наум Петрески, Гоце Арнаудов, Виолета Томоска и уште многу други изведувачи и уметници. Првата таква забава ја организиравме во 2013 и од тогаш до сега се организирани преку 10-тина такви забави. А се надеваме на многу повеќе во иднина. 

На прашањето кои македонски песни им ги бара публиката тие ќе речат: 

Антонио: Сите песни ми имаат некое значење, но најдраги ми се песните на Тоше и Нокаут бидејќи имаат некоја силна емоција што допира до мене. 

Владо: Па искрено мојата желба и идеја е да бидат застапени сите видови и жанрови на музика, но мене лично фанкот ми е слаба точка. 

Ристе: Мене лично сите македонски песни ми се убави и мерак ми е да ги пеам, биле тоа забавни или народни. 

На забавата расположението беше на високо ниво, се пееше и играше од срце и душа. А на прашањето знаат ли да се забавуваат нашите луѓе, музичарите задолжени за тоа го кажаа своето мислење

Владо: Ние од секогаш сме биле познати и препознаени како едни од највеселите и најдружељубиви народи. Мене од секогаш ми било драго да го споделувам моето музичко знаење и нашиот разновиден мелос со сите мои колеги со кои сум соработувал, било тоа да биле од Балканот, Америка или Македонија. Да, нашите луѓе знаат одлично да се забавуваат, а во исто време да препознаат добра музика и изведба. Од секогаш ми било чест и задоволсто да настапам пред македонска публика. 

Антонио: Да бидам искрен на секоја македонска песна има одлична реакција од публиката. Се пее, се игра и навистина немам никави забелешки околу атмосферата. 

Ристе: На нашите забави е најинтересно. Со добра музика, нема лоша забава. 

Токму овој настан, која се одржа на 17-ти Мај докажа дека сите со нетрпение ја очекуваат наредната македонска забава, за чие оддржување публиката дополнително ќе се извести, а екипата на Macedonian Social повторно ќе биде таму, известувајќи и пренесувајќи импресии од самиот настан.